أنا شوفت الحب

موضوع: أنا شوفت الحب السبت مايو 01, 2010 10:17 pm

نا شوفت الحب...

ياه يارب قد كدا بتحبنا..أ

د كدا أنت رحمن رحيم وغفور..

يارب أرزقنى حبك ..

خلينى أحبك زى ما أنت عاوزنى أحبك..

أنا عرفت خلاص أنك بنحبنا ...

وخلقتنا عشان بتحبنا وعاوزنا نحبك وبس...

كل ما أنسى يفكرنى ويعلمنى ويعرفنى..

أنه رب بيربى ويعلم ويحب ..

قد أيه حنين وكريم..

كأنى شايفة الشيخ وربنا بيقوله أنا نصرتك بعد ما مت..

لو كنت مت وأنت ساجد فى بيتك مكنش حد حيصدق ،

ويعرف ويتعلم إن أنا العفو الكريم الودود..

خليتك تيجى عشان تموت موته الناس كلها تحسدك عليها...

ونشوف الرحمن فيها ونشوف معنى الحب ..

نشوف لما بيحب عبد..

حتى لو فى نظركم غلط بحبه وجبته عشان أغفر له..

كأنك أخدت حسنات كل اللى أذوك ودخلت بيها الجنة...

كأنه بيقول حتى لو عمل جبته عشان أغفر له عشان كل يوم

حد يجى يدعيله ويقرأ له قرآن وهو حتى ميعرفش أنه مدفون هنا...

ياه يارب هوه ده الحب ..

كأن ربنا بيقولنا أنتم متعرفوش وعشان متعرفوش متحكموش..

عشان اللى بيحكم بيحب وعمره ما بيظلم زينا ...

* مَثَلُ الفَريقَينِ كَالأَعمىٰ وَالأَصَمِّ وَالبَصيرِ

وَالسَّميعِ ۚ هَل يَستَوِيانِ مَثَلًا ۚ أَفَلا تَذَكَّرونَ

﴿٢٤﴾ سورة هود

سبحان الله

الآية دى جتلى فى وقت غريب وكنت بقراها

يوم ما مات الشيخ وجالى خاطر

معرفش صح ولا غلط ده

اللى أنا حسيته..

أنه مافيش وجه للمقارنة بين مسلم وكافر ..

متجبليش كلمة مسلم وتحط لى عكسها كافر..

ميتحطوش قدام بعض...أنت بتقارن مين بمين ...

تخيل أنه كلمة مسلم مينفعش تكون ضدها كافر

،تخيل المسلم قد أيه غالى عند ربنا وقد أيه بيحبه..

ياه كبيرة أوى ..

تخيل أنك تقول على مسلم كافر عشان

قال أو عمل حاجة غلط...

تخيل حد عنده علم أو معندوش

يسب عالم ويبينه على أنه مش مسلم وأنه وأنه

...سبحان الله المسلم عند ربنا غالى أوى ...

بس عندنا!!!!

مشكلتنا أن كل واحد بيبص لنفسه

على أنه هوه بس اللى غالى والتانى لأ..

كلنا غاليين على ربنا وكلنا ربنا بيحبنا وبيغفر لنا ويرحمنا..

عمرى ما تخيلت أنه يموت الموته دى

طول النهار كنت بردد وبصوت عالى من غير ما أحس

ده حيدفن فى البقيع ..ده حيدفن فى البقيع..

كأنى مش مصدقة فضل ربنا ...

ده فضل ربنا ده خير ربنا اللى كلنا عايشين فيه..

مش اللى أنا بس ومش اللى الناس الكويسة

فى نظرى بس عايشين فيه..

كلنا عايشين فيه كلنا ربنا بيحبنا ..

ومتهيألى أنه نفسه يشوفنا بنحب بعض

زى ما هوه بيحبنا ...

كنت على طول بفكر فى حديث "

لن يؤمن أحدكم حتى يحب لأخيه ما يحب لنفسه"

بس أول مرة يدخل قلبى كدا..

يعنى أيه تحب حد لدرجة أنك تغفر له-تحبه-

يعمل فيك وتدعى له..

بجد تحبه..

تشوفه بيغلط ومتدعيش عليه

يصعب عليك وتدعيله

ومتتكلمش فى حقه ولا كلمة عشان

ده حبيبك..عمرك شوفت حد بيغلط فى حبيبه..

أحبه وأدعيله وأحب كل المسلمين وأدعيلهم زى ولا مختلفين ..

صح ولا غلط.. الله أعلم أنا اللى عليا أحب مش أحكم ..

ربنا بس هوه اللى بيحب ويحكم..

أنا "نكرة" مينفعش أأله نفسى وأمشى أحكم ...

عشان الأعمال بالخواتيم وعشان ربنا العالم بالقلوب..

وعشان اللى فيه ميبقاش فيا وياخد حسناتى ويدخل بيها الجنة

وأخد سيئاته وأدخل بيها النار...

كأنى كل ما أشوف بنى آدم لحد ما أموت

بيعمل حاجة غلط حقول يمكن هوه ده

اللى يدفن فى البقيع ويصلوا عليه فى مسجد

الرسول صلى الله عليه وسلم

وأنا اللى أدفن فى مقابر الصدقة ولا حد يحس بيه

عشان سوء ظنى بالناس وحكمى عليهم ...

يارب يا ودود عافنى من أمراض القلوب

وأجعلنى ممن يأتيك يوم القيامة بقلب سليم..

وخلينى أحبك زى ما أنت عاوزنى احبك

وخلينى اشوف آياتك وأفهمها لحد ما أموت ...

وأنا دلوقتى مش خايفة أموت عشان عارفة

أن حبيبى هوه اللى حيحاسبنى ..

الحمد لله أن أنت ربنا..

الحمد لله أن أنت ربنا..

أقسمت عليك بإسمك الأعظم

الذى إذا دعيت به اجبت

وأذا سئلت به أعطيت

أنك تخلينى احبك

زى ما أنت عاوزنى أحبك

وزى ما خلقتنى عشان أحبك...

أول مرة أسمع والضحى

وأحس قد ايه أنت حنين

وكنت بتعلمه الحنية عشان يعامل بيها حبايبك ...
*
وَالضُّحىٰ ﴿١﴾

وَالَّيلِ إِذا سَجىٰ ﴿٢﴾

ما وَدَّعَكَ رَبُّكَ وَما قَلىٰ﴿٣﴾

وَلَلءاخِرَةُ خَيرٌ لَكَ مِنَ الأولىٰ ﴿٤﴾

وَلَسَوفَ يُعطيكَ رَبُّكَ فَتَرضىٰ ﴿٥﴾

أَلَم يَجِدكَ يَتيمًا فَـٔاوىٰ ﴿٦﴾ وَوَجَدَكَ ضالًّا فَهَدىٰ ﴿٧﴾

وَوَجَدَكَ عائِلًا فَأَغنىٰ ﴿٨﴾ فَأَمَّا اليَتيمَ فَلا تَقهَر ﴿٩﴾

وَأَمَّا السّائِلَ فَلا تَنهَر ﴿١٠﴾ وَأَمّا بِنِعمَةِ رَبِّكَ فَحَدِّث ﴿١١﴾

وكأنه

بيقول لكل حد فينا

أنت فى نعمة أنت عارفها

وعارف أنى أويتك وهديتك وعارف أنى بحبك

وحنين عليك ..ليه القسوة ده أنت شفت الحنين..ده أنت شوفت الحب

» ما الحب إلا الحب في الرحمن
» كلمه عن الحب
» الحب من طرف وآحد ~
» الفرق بين الحب والجنس
» ليس للدهر سلطان علي الحب